Suidsusanna loetas kokko
Vana-Võromaa suidsusannu kuuntüükogo iistvõtmisõl plaanitas kokko lukõ kõik Eestin olõva suidsusanna ja uuritas ka sannakombidõ kotsilõ nii Vanal Võromaal ku terven Eestin.
„Sannalda kombõ ei püsü tuuperäst olõmi võtnu ette suidsusanna kokko lukõ niimuudu, et suidsusanna perrerahvas and esi umast sannast teedä,“ seletäs sannu ülelugõmist Mooska suidsusannatalo pernaanõ Veeroja Eda ja kitt, et sannu ülelugõminõ olõ-i keeroline: „Lugõmisõl saa vanõmb põlvlund, kinkäl om suidsusannast inämb tiidmiisi, kutsu appi latsõ vai latsõlatsõ, kiä mõistva nutiktelefoni pruuki. Ütenkuun saa minnä sanna mano, tetä sannast pilte, kõnõlda sanna saamisõ luku ja juttõ sannan käümisest. Tollõ tiidmisega saa ankeedin vastussõ kirja panda, neo läbi võrgu är saata ja omgi tettü!“
Kõgõ lihtsamb omgi umast sannast teedä anda mõnõ nutigu vai laabatsiga. Kokkolugõmisõ elektroonilinõ vorm om savvusann.ee lehe pääl. Sääl tulõ küsümüisile vastada ja sõs vastusõ är saata. Sanna kirjäpandmisõl küsütäs sanna asokotust, sanna ehitämise aigo ja luku, tahetas teedä perre sannakombidõ kotsilõ ja saa saata ka mõnõ pildi umast suidsusannast.
Sanna saat är märki ka veebikaardi pääl. Ankeete vastussõ korjusõ Võro Instituuti andmõkokko, sannu avitasõ perän kaardi pääle panda asjatundja Maa- ja Ruumiammõdist. Sannast saat teedä anda ka paprõ pääl küsümüisile vastatõn, niisama võit vastussõ saata e-postiga. Täpsämbält saat kõgõ kotsilõ küssü ülelugõmisõ iistvõtjidõ käest.
Keväjäsel käänüpääväl alanu suidsusannu ülelugõminõ käü talvidsõ käänüpääväni. Suidsusannaperimüse korjaminõ ja suidsusannu ülelugõminõ passisõ häste kokko ka parhilladsõ raamaduaasta ja mi talgokultuuriga. Timahava passis just häste savvusannatalossit kõrralda ja uma talgo üles märki ka „Teeme ära!“ talgopääväl. Ligembät teedüst timahavadsõ „Teeme ära!“ talgopäävä kotsilõ saa mahlakuu alostusõst veebiaadrõsi teemeara.ee päält.
Vahekokkovõttit, kuis kokkolugõminõ lätt ja midä põnõvat om joba vällä tulnu, tetäs suvidsõ ja sügüsedse käänüpäävä paiku. Kokkolugõmise tulõmusõ saa teedä seo aastaga lõpus.
Suidsusann, midä üldäs mõnõl puul ka savvusann, om ilma korsnalda sann. Sannaaho pääl omma kuhjan keressekivi, miä köetas puiõga kuumas. Kuuma keresse pääle vett hiiten saa sannalõunu.
Vana-Võromaa suidsusannakombõ omma UNESCO vaimlidsõ kultuuriperändüse esindüsnimistün aastagast 2014, a ku pallo ja määndse mi sanna omma, määndsist kombist peetäs luku – tuu kuigi selge olõ-i. Sannaumanigõ hää abiga tahetaski prõllanõ sais selges tetä. Ettevõtmist tugõva Eesti Rahvakultuuri Keskus ja Eesti Kultuurkapitali Võromaa ekspertgrupp.
